كان النور ضعيف فى حجرة الرعاية .. الأصوات كلها زى ما تكون اختفت أو بتختفى و صوتها هى بس جاى من حتة بعيد .... و هو ماسك ايديها و بيبكى ...
 
-         بقى لما ربنا أراد انى أعرفك و ارتاح فى الونس معاكى خلاص حتمشى
-         المهم ان احنا اتقابلنا و عرفنا بعض تصور كنا ممكن نتوه من بعض يوم القيامة على الاقل كده احنا على ميعاد و انا عارفاك و انت عارفنى
-         حتوحشينى اوى مش قادر اتخيل حياتى من غيرك و بعدين احنا فين و يوم القيامة فين
-         يا حبيبى كلها فترة قصيرة و حنتقابل تانى صدقنى ده كرم كبير من ربنا اننا عرفنا بعض هنا فى الدنيا كنت حاحتاس لوحدى فى الجنة و أنا بادور عليك .. دلوقتى أنا حاعرفك ساعة القيامة و حندخل الجنة ان شاء الله ماسكين ايدين بعض
-         ايش ضمنك بس
-         خليك متفائل أنا الحمد لله ماشية بضمان انا صبرت و انت صبرت معايا و مش بس صبرنا انا كمان ماشية مرضية انى عرفتك اخيرا قبل ما امشى من هنا ... انا عشت معاك سنة بعمرى كله ... ماكانش حد بيصدقنى لما باقول ان العمر ممكن كله يبقى طعمه حلو فى كام ساعة حلويين تعيشهم من قلبك بحق و حقيقى و انا كنت دايما صابرة فى وحدتى و مستنياك على امل انى اعيش معاك كام يوم فى ونس ربنا يبقوا بعمرى كله فى الدنيا لحد ما نتقابل تانى على خير فى الجنة ..و ربنا ما كسفنيش قابلتك و عرفتك و اتونست بيك و كنت معايا لحد اللحظة دى و حتوصلنى بايديك لأول الطريق وكفاية ان آخر نفس حيكون معاك و آخر حضن حيكون حضنك و آخر لمسة ايد حتكون لمسة ايدك .... صدقنى الوقت حيعدى بسرعة و نتقابل تانى للأبد ...
-         نفسى ابقى فى قوتك دى أنا مش عارف استوعب اللى بتقوليه ده
-         حتستوعبه أهم حاجة تفتح قلبك للفكرة ... أنا عمرى ما كنت من هنا و عمرى ما عرفت أفهم الناس و أحوالهم و علشان ما فقدش هدوءى و بساطتى كنت دايما دايما عايشة فى بيتنا هناك .. كانت مشكلتى الوحيدة انى مش عارفة مين هيكون معايا ... الحمد لله دلوقتى عرفت ...
-         بيتنا هناك
-         شوف بقى يا سيدى ركز معايا بقى علشان من دلوقتى تاخد فكرة ... ان شاء الله ربنا يديلنا قصر طبعا كبير ... بس الحقيقة بقى أنا مش ناوية اقعد فى قصور طبعا ماحدش يرد عطية ربنا فأنا حاقعد العيال فى القصر و انا و انت نقعد فى كوخ على باب القصر ... كوخ صغنن كده يطل على البحيرة بتاعتنا و يكون متحوط بالنخل و الشجر ... وجنب الكوخ مرجيحة مقطقطة على قدنا أنا و انت ... و زحاليق العيال و مراجيحهم فى الناحية التانية ....
-         انتى حتسيبى العيال لوحدهم حيجيلك قلب
-         يا حبيبى دى الجنة يعنى فى أمان ربنا و ونس الملايكة و احنا بقى انا و انت نشوف لنا يومين حلويين ... انت حتبقى واحشنى اوى مش معقول بقى نعيش طول النهار فى الزحمة احنا نعيش حياتنا الصبح على سطح البحيرة بتاعتنا و نلعب و ننبسط و بعدين نروح للعيال برضك نتمتع بيهم و نتفسح معاهم فى كل حتة و نوديهم لجدودهم ماما كان نفسها تشوف عيالى هى و بابا بس ما لحقوش فى الدنيا اعوضهم بقى فى الجنة ان شاء الله
-         و مامتى و بابايا برضك
-         اكيد يا حبيبى طبعا شوف انا رأيى احنا نسكنهم مع العيال فى القصر و ننطلق احنا بقى نعوض السنين اللى اتحرمنا فيها من بعض ...
-         فكرة برضك ... الا انتى نفسك فى بنات و الا ولاد
-         لا بنات طبعا الولاد متعبين ... انت الولد الوحيد اللى ممكن احبه و يبقى البيبى بتاعى خلاف كده ما عنديش استعداد ...
-         و حتعمليلى محشى
-         انا حاطلب شجرة محشى ورق عنب فى الجنينة تطرح كل يوم
-         شجرة محشى
-         أمال حأقعد ألف محشى  ... مافيش داعى نضيع الوقت
-         ماهو مافيش وقت حيضيع خلاص بقى انتى ناسية ان ده الخلود
-         اه صحيح .. بس برضك انا باعز الكسل زى عينيه و بصراحة انا شقيت لما قلت يا بس علشان خاطر ربنا و مش ناوية اشتغل تانى فى الجنة
-         عندك حق و انا كمان
-         و بعدين فى الجنة اطلب تجاب كل حاجة موجودة هو انت فاكرها الدنيا الفقرانة اللى احنا فيها دى
-         عندك حق حنبقى اخر راحة
-         اه يا سيدى يا سيدى ...
-         و لا زحمة و لا مذاكرة و لا شغل و لا زنقة مواصلات و لا ناس مشحونة من بعضها اونطة
-         اه يا عينى يا عينى صحيح
-         قول لى صحيح انت ناوى تتجوز كام واحدة
-         و الله كل اللى ربنا يجيبه كويس
-         يا غلس و بتقولها ف وشى
-         يا ستى مانتى هناك مش حتغيرى
-          بس انا لسه هنا
-         طيب خلاص عموما انا مش حاسيبك و اروح ف حتة الا لما تزهقى منى و ان جيتى للحق بقى بيتهيألى انا مش حاعوز غيرك فى الجنة
-         صحيح
-         اعتقد هذا
-         يا بايخ قول ايوه صحيح اضحك عليه يا اخى
-         طب تصدقى و تؤمنى بالله
-         لا اله الا الله
-         انا من ساعة ما قابلتك و انا عارف انى مش ممكن اتمنى غيرك و من ساعة ما شفت الحب و الونس اللى وريتيهولى بهداوتك و طيبتك الملائكية و انا عارف برضك انك مش اهل الدنيا ... و كنت خايف اوى من اللحظة اللى اعرف فيها انك ماشية و سايبانى
-         ما تقلقش شوية بس و حاقعد على قلبك للأبد بس انت اصبر و خليك حبوب لحد ما تحصلنى
-         ادعيلى ربنا يثبتنى بس و استحمل لوحدى
-         حتستحمل انت قدها و قدود يا ملك الغابة
-         ماشى يا لمضة
-         تصدق الأوكسجين ده روش اوى ,, تاخد شمة
-         منعش!!
-         جدا ... صدقنى جرب لك شمة على الماشى كده ... فرصة شمة بلوشى يا حلاوة
-         اعمل فيكى ايه بس و فى نافوخك اللاسع ده
-         ولا حاجة تفضل تحبنى و بس
-         هو انا اقدر اعمل حاجة غير كده
-         لا ما تقدرش فعلا
-         ده ايه الغرور ده
-         لا دى ثقة يا بابا مبروك عليك انا
-         اعمل فيكى ايه
-         طلعنى السرير
-         لا مش مطلعك
-         انا حامشى دلوقتى طلعنى
-         بلاش دلوقتى
-         يا ريت كان بايدى ... معلهش سامحنى
-         باحبك ما تمشيش
-         خد ايدى بس لحد ما اللحظة دى تعدى
-         خايفة
-         لا مش خايفة الحمد لله صدقنى انا ماشية من غير خوف بس عايزة ايدك نكون اخر حاجة المسها
-         باحبك
-         انا كمان باحبك اوى و ما حبتش من الدنيا غيرك و ما يتهيأليش كان ممكن احب غيرك و لولاش اللى رايحة له مالك الملك ماكنتش سبتك... بس اللقا وجب و ما ينفعش ترد دعوة الملك
-         صحيح
-         اسمع اوع تعيط انا ماباحبش النكد هو انت لا سمح الله موصلنى النار انت ان شاء الله تسلمنى لملايكة الجنة ... و الحتة اللى تحطنى فيها تبقى كلها زرع بيسبح
-         حاضر
-         لا اله الا الله محمد رسول الله عليها نحيا و عليها نموت  عليها نبعث ان شاء الله آمنين
-         لا اله الا الله محمد رسول الله عليها نحيا و عليها نموت  عليها نبعث ان شاء الله آمنين
 
السكوت خيم على المكان صوت الرجلين رايح جاى ... المكن بيدى اشارات كلهم بيحاولوا يرجعوها .. بس ماعادش ينفع ... ضربات القلب لسه مسموعة ... تهيؤات هى قالت ان اللقا وجب ... صوت ادان الفجر عمال يعلى ... صحيح اللقا وجب ...
ستاير الشباك عمالة تتهز بعنف ... الورق عمال يطير ... صوت العصافير عمال يعلى ... و دواية الحبر كانت على وشك تندلق ....
صوت ام العيال جاى من بعيد ...
مش قلت لك ميت مرة تقفل الشباك ... مش كفاية بتقوم تعبان من السهر على ورقك و حواديتك كمان عايز تستهوى و تعدى العيال..
استهوى و اعدى العيال ... انتى مين ... انا ايه اللى جابنى هنا ... ليه بس رجعونى من الجنة ... مانا كنت حلو هناك .....
صوت العيال و المراجيح و لون البحيرة و الكوخ النونو لسه بيزغزغ ودانه و عينيه و نغاشيش قلبه... هيييييييييييييييه لا حول و لا قوة الا بالله ........... راضيين يا رب ............ و عشمانين و مستنيين يا رب.... بس لو ممكن تهديلنا ام العيال بس حتى عشان نثبت على الطريق ....... ... مش كتير عليك تجبر بخاطرى  و تونسنى بيها يا رب ... هيييييييييييييه الف حمد و شكر ليك يا رب ....
 
فى الناحية التانية من البيت ام العيال ... هيييييييييييييييه لا حول و لا قوة الا بالله ........... راضيين يا رب ............ و عشمانين و مستنيين يا رب....بس لو تهديلى ابو العيال علشان نستحمل الدنيا على ما اللقا يوجب ... نفسى يبطل يبص لى كانى الأشكيف المرعب اللى طالعله من حيث لا يدرى ... هو انا يعنى لازم اعمل له غادة الكاميليا و اطرش دم و اكح و اقول له الوداع يا ارمان علشان يحبنى ... طب ده انا حاشياله امبارح هوه و عياله 90 صباع محشى ف عين العدو خلصوهم ماشاء الله على سفرة واحدة ... و برضه مش عاجباه ... اهديهولى يا رب ... هو راجل امير بس  خياله مركب نفاثة ... اهديهولى يا رب ... مش كتير عليك تجبر بخاطرى  و تونسنى بيه يا رب ... هيييييييييييييه الف حمد و شكر ليك يا رب ....
 
س.م.
 
 

 


 
 
 

 

The Egyptian Chronicles is a co-op of Egyptian authors.
Articles contained in these pages are the personal views, or work, of the authors,
who bear the sole responsibility of the content of their work.

BACK TO MAIN PAGE


 

For any additional information, please contact
the Webmaster of the Egyptian Chronicles:

DESIGNED BY