بسم الله الرحمن الرحيم
 
مصر أرضها طيبه
ما تحبش التلاكيك
لو غفت غفلة طارئه
و حكمها يوم مماليك
لا يمكن نرجع لها
و لو قدر يبيض الديك
مصر دي مركبه
يركبها كل صديق
و العدو من الغبا
عايزها تبقى حريق
يفرق بين دا ودا
بالكذب و التلفيق
لجل ما تروح في الوبا
و يصبح كلامنا نهيق
نخاف من بعضنا
ما لناش أخو و شقيق
بعد كل من حولنا
وقعوا في بئر عميق
لو مدوا ايدهم لنا
أعطونا شوال دقيق
و احنا من غلبنا
نترجى التوفيق
من عدو بان لنا
عامل نفسه شريك
 مفروس من عشقنا
لأحلى وطن و عشيق
خيره من تحتنا
أغلى من دهب و عقيق
يا خده ليه مننا
بكام شوال دقيق
دا القمح دا قمحنا
فاكرين يوسف الصديق
محتاج عمل مننا
لابد يوم نفيق
يا طين أرضنا
يا نسمة فجر رقيق
و إنتي كمان يا سما
مفتوحة للتحليق
نرفع إيدينا كلنا
ندعو رب شفيق
يجمع قلوب شعبنا
كفانا اليوم تفريق
الوطن يحميه لنا
بوحدتنا الكل شقيق
يجعل كلامنا عملنا
بالعرق يزول الضيق
و نمشي مع بعضنا كلنا
ايدنا مع بعض فريق
لا يقدر يوم يفرقنا
أبليس بلبس أنيق
مهما قلت يا ملعون
ما تقدر تطعن شقيق بشقيق
و لا يمكن يعود اليوم
لتحكمنا بالمماليك
 
أبو حميد المصري 


 

 


 

© Ahmed El-Tabbakh 2004


 

The Egyptian Chronicles is a co-op of Egyptian authors.
Articles contained in these pages are the personal views, or work, of the authors,
who bear the sole responsibility of the content of their work.

BACK TO MAIN PAGE


 

For any additional information, please contact
the Webmaster of the Egyptian Chronicles:

DESIGNED BY